NAGA CITY- Tolong persona an kumpirmadong binawian nin buhay sa magkakasuway na mga aksidente sa tinampo na nangyari sa probinsya nin Quezon.
Sa nakuang impormasyon kan Bombo Radyo Naga, napag-araman na binabagtas kan motorsiklo na minamaneho ni Miguel Atis, 23-anyos, miyembro kan Philippine Navy an kalabaan kan tinampo sa barangay Malinao Ilaya sa banwaan nin Atimonan kan makabangga ini sa tuong parte kan sarong pick-up na minamaneho ni Junario Sayson, 54-anyos.
Marikas man na pigdalagan sa ospital an driver kan motorsiklo asin an backrider kaini na si Joy Priagola, 23-anyos alagad pigdeklarar na ining dead on arrival kan mga doktor mantang tulos man na pigbulong an mga lugad na pigsapo ni Atis.
Gadan man makalihis na mahagop nin motorsiklo na minamaneho ni Vernon Subremonte, 21-anyos an 7-anyos na aking biktima mantang pabalyo ini sa tinampo sa parte kan barangay Cogorin Ilaya sa banwaan nin Lopez.
Apwera sa menor de edad, nagsapo man nin lugad sa saiyang lawas an backrider na si Reazel Rocha na tulos man pigdalagan sa ospital para maipabulong.
Mientrastanto, dae naman nakaabot pa sa ospital an miyembro kan Philippine National Police (PNP) na si PO1 Dant Paul Sambile, 26-anyos makalihis na makabangga an nilulunadang motorsiklo sa saro pang motorsiklo na minamaneho ni Jimerson Rivera, 39-anyos na nangyari sa barangay Pagkakaisa sa banwaan nin San Narciso.
Nagsapo nin lugad sa saiyang payo an nasambitang pulis na nagresulta sa pagkagadan kaini.
Sa ngonyan, nagpapadagos pa an imbestigasyon kan mga otoridad katakod kan nasambitang magkakasuway na aksidente sa tinampo na nangyari sa probinsya nin Quezon.
