Iginiit ni Cameroon President Paul Biya na kailangan ng mundo ang mensahe ng kapayapaan ni Pope Leo XIV sa unang araw ng pagbisita ng Santo Papa sa bansa bilang bahagi ng kanyang African tour.
Sa isang talumpati sa harap ng Santo Papa, sinabi ng 93-anyos na lider na ang mundo ay nangangailangan ng mensahe ng kapayapaan, katarungan, pagpapatawad, at pagmamahal na dala ni Pope Leo XIV.
Dumating ang Santo Papa sa Cameroon bilang ikalawang bahagi ng kanyang apat-na-bansang paglalakbay sa Africa, na layong palaganapin ang diyalogo, pagkakaisa, at kapayapaan sa gitna ng lumalalang tensyon sa iba’t ibang panig ng mundo.
Bagama’t hindi direktang binanggit, sinabi ni Biya na nagaganap ang pagbisita sa isang “mahirap na kontekstong pandaigdig,” kasabay ng nagpapatuloy na sigalot kabilang ang digmaan sa Iran.
Sa mga nakalipas na linggo, naging mas vocal si Pope Leo XIV sa panawagan para sa kapayapaan, lalo na sa gitna ng patuloy na labanan, at binigyang-diin na ang kapayapaan ay hindi lamang dapat salita kundi isinasabuhay.
Samantala, umani ng batikos mula kay US President Donald Trump ang Santo Papa dahil sa kanyang mga pahayag laban sa digmaan at iba pang isyung pandaigdig, kabilang ang immigration at foreign policy.
Sa kabila nito, nananatiling sentro ng pagbisita ng Santo Papa ang pagsusulong ng kapayapaan at pagkakaisa, lalo na sa Africa kung saan may umiiral ding mga sigalot at krisis.
Inaasahang magpapatuloy ang kanyang paglalakbay sa iba pang bansa sa Africa sa mga susunod na araw bilang bahagi ng kanyang misyon na palakasin ang mensahe ng diyalogo at pag-asa sa buong mundo.
