Sarong insidente nin pambabadil an nangyari poco mas o menos ala 1:00 nin aga kan Hunyo 9, 2023 sa Barangay Nagcalitan, Del Gallego, Camarines Sur, Pilipinas, na ikinagadan kan sarong 32-anyos na babae makalihis na nagin bayolente an diskusyon ninda kan saiyang nobyo.
Sa intrevista kan Bombo Radyo Naga ki PCPT Jason Canuto, Acting Chief of Police, Del Gallego MPS, sinabi kaini na basado sa inisyal na imbestigasyon kan mga otoridad, nakainom an suspek na binistong miembro kan Armed Forces of the Philippines kan mangyari an insidente. Nagluluwas na an relasyon kan duwa nagin tensionado sa laog nin haros sarong taon, asin an pag-imon an pigsambit na mayor na kawsa kan mainit na diskusyon na nagin dalan kan pambabadil.
Segun pa ki Canuto, tulong tama nin bala sa saiyang likod an sinapo kan biktima na iyo an naging kawsa kan saiyang tulos na pagkagadan. Mientrastanto, makalihis an insidente, nagprobar suboot na magkua nin buhay an suspek sa paagi nin pagbadil sa saiyang toong mata asin presenteng pigbubulong sa sarong ospital sa syudad nin Naga, Pilipinas sa irarom kan mahigot na pagbabantay.
Nagluluwas man sa imbestigasyon na igwang naenot na report nin pang-aabuso sa biktima, alagad dae man suboot pigpursige o pormal na pigreklamo sa mga awtoridad. Padagos man an pagpreparar kan mga otoridad sa kasong murder kontra sa suspek mientras na pighahalat an saiyang recovery tangani na maproseso an pormal na detention.
Pigtawanduon kan opisyal an importansya kan disiplina, urog na sa mga nagpapaotob kan ley asin militar mantang pigpapagiromdom na an salang desisyon may relasyon sa pag-inom nin arak pwedeng magresulta sa magabat na penalidad asin bilog na buhay na consequence. Sa ngunyan, pig-iimbestigaran pa an kaso ngani na masierto an hustisya para sa biktima asin magin maray an dalagan kan legal na proseso.
