Gadan an duwang katawo makalihis na inanod kan makusog na flash flood an apat na excursionists na nagkakarigos sa sarong seksyon kan Paniquan River sa banwaan kan Lagonoy kan Martes na hapon.
Sa intrevista kan Bombo Radyo Naga ki Romel Batanes, Admin and Training Section Officer kan Municipal Disaster Risk Reduction and Management Office (MDRRMO) kan Lagonoy, sinabi kaini na mga alas 10:00 nin aga an naglaog sa lugar an apat na excursionist para magkarigos sa salog.
Segon ki Batanes, poco mas o menos alas 2:00 nin hapon, bigla na sanang nagbulos an makusog na uran sa kabukidan harani sa Loksohan Falls, na nagkawsa nin flash flood sa salog, dawa mayo nin uran sa ibabang parte kan barangay.
Tulos man na nagkondusir nin search and rescue operation an MDRRMO kaiba an iba pang rescuers, alagad paramientras na pigsuspinde an operasyon pagkabanggi huli sa hararom asin madiklom na tubig asin kawaran nin liwanag.
Nakua an bangkay kan babaeng biktima sa bukana kan dagat sa Barangay Panicuan, labing sarong kilometro an rayo sa kun saen sinda nag-abot tanganing magkarigos. Mientrastanto, narekober man kan mga rescuers an bangkay kan sarong lalaki na suboot nadukayan na naglalataw-lataw sa salog.
Aminado man an opisyal na nagkaigwa nin isyu sa pamamahala kan lugar huli sa iwal kan duwang barangay na parehong nag-aangkin kan nasambitan ng lugar. Huli kaini, nagkaigwa nin kakulangan sa implementasyon kan mga lakdang sa kaligtasan asin pagbantay sa mga turista na naglalaog.
Sa ngunyan, plano kan lokal na gobyerno na magkaigwa nin pagtiripon sa pag-ultanan kan mga nanonongdan na barangay asin munisipyo tanganing pag-olayan an mga safety measures arog kan pagbugtak nin mga karatula, pagpapautob kan regulasyon, asin mas mahigot na pagbantay sa mga nagbibisita sa lugar.
Nagpagirumdom an MDRRMO sa publiko na makipag-ulay muna sa mga opisyales kan barangay bago magpasiring sa mga salog, falls, asin iba pang tourist spots, asin sunudon an mga ipinapaotob na mga patanid asin regulasyon tanganing maibitaran an kaparehong insidente.
