Benipesyaryo an Barangay Cawayan, Libmanan, Camarines Sur kan P10 -M na kantidad na proyekto gikan sa national fund, apwera pa sa P500,000 na alokasyon na itatao kan lokal na gobyerno kan Libmanan para sa mga programa asin proyekto kan barangay.
Segun ki Mayor Edelson Marfil, alkalde kan banwaan nin Libmanan, target kan lokal na gobyerno na matawan nin tig-P500,000 an 40 barangay sa presente na taon sa paagi kan Economic Development Fund. An nasabing pondo gagamiton para sa mga proyektong makakatabang sa pag-uswag asin kapakanan kan mga komunidad.
Sa parte kan Barangay Cawayan, gagamiton an pondong mareresiber para sa pagpapagibo nin sarong tulay sa sakop na sitio. Katuyohan kan proyekto na mapadali an pagbalyo asin paglikay kan mga residente sa panahon nin kalamidad, partikular na kun igwa nin pagbaha sa lugar.
Ngunyan na taon, 40 barangay an matatawan nin alokasyon mantang an natatadang 35 barangay sa banwaan tatagamahan man nin kaparehas na kantidad sa masunod na taon bilang kabtang kan padagos na programa kan lokal na gobyerno para sa kaunlaran kan mga barangay.
Kasunod man kaini, kinundusir kasuudma, Mayo 21, 2026, sa Barangay Cawayan an programa kan Department of the Interior and Local Government na “Ugnayan sa Barangay” kaibanan an iba’t ibang ahensya kan gobyerno. Nakilahok digdi an Department of Labor and Employment, Department of Trade and Industry, PhilHealth, Department of Agrarian Reform, asin iba pang ahensya tanganing maidulok sa mga residente kan barangay an nagkakaibang serbisyo kan gobyerno asin LGU.
