Naging matuninong asin organisado an pag-uswag kan Undas sa banwaan nin Nabua, Camarines Sur, makalihis na mayong nairehistrong seryosong insidente sa mga lugar na pigbabantayan kan mga pulis.
Segun ki PLTCOL Ciriaco Pacer Jr., Chief of Police kan Nabua, namantinir an seguridad sa tabang kan mga stakeholders, opisyales kan barangay, asin kan lokal na gobyerno kan baryo.
Pig-apresyar man kan opisyal an aktibong partisipasyon kan lokal na gobyerno, partikular na an hepe ehekutibo kan banwaan, na personal na nagbabantay sa mga aktibidad tangarig na masiguro an seguridad asin kaayusan kan publiko.
Base sa estimasyon kan mga awtoridad, uminabot sa 5,000 hasta 6,500 an nagbisita sa pampublikong sementeryo sa Barangay Santiago, na yaon sa kahalabaan kan Maharlika Highway.
Nin huli sa piglalaoman na pagdagsa kan mga pamilya asin bisita sa mga kamposanto, nag-assign nin mas dakul na personahes an mga pulis sa mga lugar na piglalaoman na madagsa an publiko.
Igwa man nin mga police assistance stations asin Quick Reaction Teams gikan sa Provincial Headquarters ngani na mas mapakusog an kapasidad kan kapulisan na magresponde sa anuman na emerhensya o dae piglalaoman na pangyayari.
Segun ki Pacer, pinakusog man ninda an police visibility sa paagi kan estratehikong pag-assign nin personnel sa mga kamposanto asin iba pang pampublikong lugar.
Kabali ini sa direktiba kan regional director na dagdagan an presensya kan mga pulis sa mga pampublikong lugar tangarig na maibitaran an mga posibleng insidente asin mamantinir an kaayusan.
Nareparo man kan mga awtoridad na iguang mga residente y familia na dae nakabisita sa sementeryo kan mismong aldaw kan Undas asin piniling magduman sa mga masunod na aldaw, na piglalaoman na mas harani na an mga tawo.
Makalihis ini, padagos an pagmonitor kan kapulisan asin pag-assign nin mga personahes para masierto an kaligtasan asin kaayusan kan mga nagbibisita sa sementeryo.
Mientrastanto, dakula an pasasalamat kan kapulisan sa mga pamilya asin residentes na nagtabang asin nagsunod sa mga patanid asin instruksyon kan mga otoridad.
Pigduon kan pulis na importante an disiplina asin kooperasyon kan publiko tanganing mamantinir an kahusayan, kaligtasan, asin orden sa panahon kan Undas.
