Temporaryong ipinautob an mahigot na seguridad sa nagkapirang lugar sa Barangay Balogo makalihis na magpaluwas nin executive order si Mayor Nino Tayko na nagbabawal sa gabos na marine activities arog kan pagsira asin paglangoy sa Sitio Kamagong asin Sitio Mainit. Ini tangarig na masierto an kaligtasan kan mga residente durante kan high-risk military maneuvers asin live-fire exercises.
Sa intrevista kan Bombo Radyo Naga ki Arnel Ama, Barangay Kagawad, Balogo Pasacao, sinabi kaini na
komo parte kan safety measures, 41 pamilya an pig-ebakwar hale sa mga apektadong lugar pasiring sa mga evacuation centers sa Odicon asin Junction Passako. Segun sa lokal na gobyerno, nagin mahiwas asin organisado an pag-ebakwar nin huli sa padagos na koordinasyon kan barangay asin mga awtoridad.
An nasabing military exercise ginibo bilang pinakaenot na large-scale live-fire drill sa lugar, na ginamit an mga helicopter, explosives, asin rocket systems. An ehersisyo parte kan magkasararong operasyon kan Philippine Army asin kan Australian Army na may katuyuhan na mapakusog an kakayahan sa depensa asin mapapararom an internasyunal na kooperasyon militar.
Sa ibong kan peligro, ilinadawan kan mga lokal na opisyal an operasyon na mahiwas asin “garo pelikula” huli sa eksaktong koordinasyon kan mga pwersa. Sinabi man kan report na an aktibidad nakatabang na mapakusog an mga kakayahan kan gobyerno lokal sa pag-ebakwar sa emerhensya asin pagresponde sa kalamidad.
Pagkatapos kan live-fire phase, an mga residente tinogotan na magbalik sa saindang mga harong mga alas 2 nin hapon. An nagkapirang non-live fire training exercises piglalaoman na magpapadagos sagkod sa Hunyo 25 o 26 bilang parte kan padagos na pagsasanay asin seguridad.
