48 na Distribution Utilities (DU) o tagasuplay nin kuryente sa Pilipinas an nakapagrehistro nin singil na mas halangkaw kaysa sa pambansang average na P12.43 kada kilowatt-hour (kWh) kan Hunyo, base sa pag-aadal kan energy advocacy group na Institute for Climate and Sustainable Cities (ICSC).
Base sa datos kan Electricity Rate Monitoring Platform na PRESYO-PH kan ICSC, minomonitor asin niraranggo kada bulan an mga distribution utility segun sa totoong halaga na binabayadan kan mga konsumer kada kWh.
An resulta kan pag-aadal nagluwas matapos ipahayag kan Department of Energy na an Pilipinas an may pinakamahal na singil sa kuryente sa Southeast Asia. Pero suno sa ICSC, dai lubos na naipapahiling kan pambansang average an tunay na kahimtangan kan dakul na Pilipinong konsumer, huli ta an singil nagkakaiba depende sa lokal na tagasuplay nin kuryente.
Sa 116 na Distribution Utilities na minomonitor kan grupo, 106 an on-grid asin 10 an off-grid. An on-grid utilities konektado sa pangunahing Transmission Network, mantang an off-grid utilities nag-ooperar nang nagsasadiri sa mga lugar na harayo sa sentro kan suplay nin kuryente.
Sa 106 on-grid utilities, 48 an may singil na mas mataas kaysa sa pambansang average kan Hunyo.
An Tarlac Electric Cooperative I (TARELCO I) an may pinakahababang singil sa mga utility na lampas sa average sa P12.45 kada kWh, mantang an Southern Leyte Electric Cooperative (SOLECO) an may pinakamataas na singil sa P16.57 kada kWh.
An Meralco, na siyang pinakamadakul na pribadong kumpanya nin kuryente sa bansa, nasa ika-siyam na pwesto sa talaan na may singil na P14.48 kada kWh.
Samantala, nagtaas pa an singil sa kuryente kan Hulyo matapos magpatupad an Meralco nin dagdag na P0.3428 kada kWh, na nagtao sa kabuuang singil na P14.8261 kada kWh. Katumbas ini nin dagdag na nasa P69 sa bill kan mga konsumer na gumagamit nin 200 kWh kada bulan.
Suno sa ICSC, an generation charge an pinakamadakul na parte kan kabuuang binabayaran kan mga konsumer, na bumubuo nin 46% o mas halangkaw pa kan kabuuang singil.
Huli kaini, iginiit kan grupo na kaipuhan na bawasan kan bansa an pagsarig sa Imported Fuel asin palawakon an paggamit nin lokal na renewable energy tanganing mabawasan an epekto kan pagbabago kan presyo nin enerhiya sa merkado.
Sabi pa kan ICSC, an mas sari-saring suplay nin kuryente makakatabang sa pagpapatatag kan ekonomiya, pagprotekta sa mga konsumer, asin paghanda sa mga epekto kan mga posibleng krisis sa enerhiya.
