NAGA CITY- Irido an limang persona kabale na an duwang pulis-Manila sa karambola kan tolong behikulo sa kalabaan kan tinampo sa Andaya Highway, Barangay Liboro, Ragay, Camarines Sur.
Binisto an mga nairido na sinda P/Supt. Ronilo Datu, 50-anyos, chaplain kan National Capital Region Police Office (NCRPO), PO2 Ronaldo Andaya, 29-anyos kan Camp Bagong Diwa, asin an mga pasahero na sinda Consuelo Acosta, 70-anyos, Edda Diesta, 66-anyos asin Nortita Nillo, 53-anyos.
Sa entrevista kan Bombo Radyo Naga ki PO2 Mark Anthony Cadacio, tagapagtaram kan Ragay-PNP, sinaysay kaini na mantang binabagtas kan fortuner na pigmamaneho ni PO2 Andaya an tinampo kan nasambitang lugar lunad an iba pa na mga biktima kan bigla ining nabangga kan trailer truck na pigmamaneho ni Inocencio Fuentes Jr., 27-anyos.
Apwera kan nasambitang mga lunadan, nadamay man sa insidente an saro pa na trailer truck na pigmamaneho man ni Ferdinand Pama, 50-anyos.
Katakod kaini nagsapo an mga biktima nin lugad sa manlaen laeng parte kan saindang mga lawas na tulos man na naidalagan sa ospital.
