Aram baya nindo mga ka-bombo, nabiktima kan mga online scammers an 63-anyos na Lola na gikan sa Los Angeles makalihis na patubudon ini na nasa romantic relationship sa Spanish musician na si Enrique Iglesias.
Susog sa report, si Guadalupe Cepeda an dati naman fan ni Enrique Iglesias sa laog nin haros duwang dekada.
Kun kaya kan ranihan soboot kan singer sa paagi kan social media labi an saiyang kakilhagan. Sigun sa impostor, nahanap soboot kaini si Cepeda sa online fan group na tolos man pigtubudan kan 63-anyos na Lola.
An relasyon kan duwa an nagpuon duwang taon na an nakakalihis maski pa ngani kasal si Cepeda sa ibang lalaki, nagtutubod pa man giraray ini na makakasal sa singer.
Plano na kan 63-anyos na Lola na magdulag kaibahan an Spanish superstar. Sa laog kan haros duwang taon na pakikipag-ulay ni Cepeda sa impostor na singer, nagpapadara ini nin kwarta nin huli ta naghahagad soboot sa saiya an Spanish superstar para sa pangangaipuhan kaini.
Nag-abot sa punto na mayo nang maitao si Cepede sa saiyang kaulay kaya pigsugo soboot ini kan impostor na maghabon nin kwarta sa saiyang agom.
Mientrastanto, nadiskubrer man kan agom ni Cepede an dapit sa ginigibo kan saiyang agom asin sa pekeng relasyon kaini sa nagpamalo-malo na singer sa paagi kan saindang ribayan nin mensahe sa cellphone.
Imbes na komprontahon si Guadalupe, mas pinili kaini na ipaliwanag sa saiyang agom na dae totoo an saindang relasyon kan singer asin biktima sana ini kan scam. Alagad, maski anong paliwanag dae nagtutubod an 63-anyos na Lola asin pigtatawan duon na si Enrique Iglesias an saiyang nakakaulay.
Huli kaini, nagdesisyon an agom ni Guadalupe na iheras an sitwasyon kan saiyang agom sa sarong TV program na nagin viral.
Alagad maski an bilog na kinaban an nakilhag sa istorya ni Guadalupe, dae pa man giraray ini nagtubod na impostor sana an saiyang karelasyon.
Digde na nakiulay an agom ni Guadalupe sa Spanish singer na klaruhon an sitwasyon asin sabihon na bako ini an nakakaulay kan saiyang agom.
Katakod digde, maski dae nagtao nin anuman na reaksyon an singer dapit sa kakaibang istorya na ini, nagpost man ini sa saiyang Instagram kasuarin sana kun saen pig-abisuhan an saiyang mga fans na magin malikay asin dae magtiwala sa mga tawo na impostor kan saiyang pagkatawo.
