Pigsierto ni Presidente Ferdinand Marcos Jr., sa mga negosyanteng Koreano na an administrasyon magpapadagos sa pag-implementar nin mga mayor na reporma sa ekonomiya tanganing orog pang mapakusog an kumpiyansa kan mga investor sa Pilipinas.
Sa saiyang diskurso sa Philippines-Korea Business Forum, sinabi kan Presidente na hinahale kan gobyerno an mga burukratikong ulang, binababa an gastos sa pagnegosyo, asin pinapakusog an kakayahan kan nasyon na makipagkumpetensya sa global na merkado. Yaon man sa pagtiripon si Presidente kan Republika kan Korea, si Lee Jae Myung.
Sinambit man ni Presidente Marcos an nagkapirang importanteng ley na nagsusuporta sa investment growth, kabali na an Create More Act na nagtatao nin insentibo para sa mga darakulang proyekto na may puhunan na dai mababa sa P50 bilyon o na makakamukna nin 10,000 na trabaho. Itinuro man niya an Capital Markets Efficiency Promotion Act na nagpababa kan stock transaction tax gikan sa 0.6% pasiring sa 0.1% tanganing magin mas episyente an merkado nin kapital. Sinabi niya na pinagian man an mga reglamento para sa mga foreign investors sa paagi kan mga pag-amyenda sa Foreign Investments Act asin Retail Trade Liberalization Act ngani na magin madali an paglaog kan mga negosyo sa nasyon.
Katakod kaini, pig-iimplementar an Executive Order No. 18 o an Green Lanes for Strategic Investments tanganing maparikas an pag-aprobar kan permit para sa darakulang proyekto.
Naglalaom an Presidente na an forum magbubunga nin mas makusog asin makahulugan na relasyon sa komersyo sa pagultanan kan Pilipinas asin South Korea, orog na sa sektor nin shipbuilding, nuclear energy, aerospace, electronics, asin biotechnology.
