Estudyante gadan makalihis na malamos sa katahawan nin Family Outing sa Quezon

NAGA CITY- Napuli sa trahedya an maugma outing kuta na kan pamilya makalihis na malamos an sarong estudyante sa Tipuan Falls sa Real, Quezon.

Binisto an biktima na si Sherwin Libradilla, 19-anyos.

Sa nakuang impormasyon kan Bombo Radyo Naga, napag-araman na nagpasiring sa Tipuan Falls sa barangay Llavac sa nasambitang banwaan an pamilya kan biktima tanganing mag-outing.

Alagad, nadangog na sana suboot kan ina kan biktima na si Tessie Libradilla na igwa ng nagkukurahaw na nalalamos na an saiyang aki sa hararom na parte kan nasambitang falls.

Nag-abot pa suboot sa haros sarong oras antes nadukayan an lawas kan biktima na idinalagan pa kuta na sa ospital alagad pigdeklarar na ining dead on arrival kan mga doktor.