NAGA CITY- Nag-abot nin haros apat na oras an pagkagurubot nin bulos kan trapiko sa parte kan Viñas, Quezon makalihis an nangyaring banggaan nin truck asin pampasaherong bus.
Sa nakuang impormasyon kan Bombo Radyo Naga, napag-araman na ala-1 nin mag-uumagahon ngonyan na aldaw, sinalpok kan pampasaherong bus kan Peñafrancia tours an sarong truck na pano nin plastic wares na pasiring kuta na sa Metro Manila.
Sa kusog kan pagkakabangga, nawasak an enotan na parte kan bus asin truck alagad mayo man nairehistrong nairido sa nasambitang pangyayari.
Huli sa nangyaring aksidente, nag-abot nin haros apat na oras na nagkagurubot an bulos nin trapiko sa nasambitang lugar asin subagong alas-4 nin mag-uumagahon sana tinutugutan na makaagi an mga lunadan.
Sa ngonyan, nagpapadagos pa an imbestigasyon kan mga otoridad sa nasambitang pangyayari.
