NAGA CITY- Planong paimbestigaran kan Volunteers Against Crime and Corruption (VACC) an sinasabing ‘Palit-Ulo’ scheme ni Vice President Leni Robredo.
Sa entrevista kan Bombo Radyo Naga ki VACC Founding Chairman Dante Jimenez, sinaysay kaini na plano pa nanggad kan saindang organisasyon na paimbestigaran an pigbuyagyag na ‘Palit-Ulo’ scheme sa Philippine National Police (PNP) kan bise presidente.
Pigklaro man ni Jimenez na naihapot na ninda sa mga representante hale sa mga law enforcement agencies an nasambitang bagay asin mahigot man ninda ining pinahimutikan.
Basado sa video message na ipinadara ni Robredo sa United Nations Commission on Narcotic Drugs, sinaysay kaini na nangyayari an ‘palit-ulo’ sa mga operasyon kan PNP kun saen kinukua an mga kaparyente kan sarong pigtutubudang drug personality karibay an pagsuko kaini sa mga otoridad.
Enot pa kaini, kinumpirmar man ni PNP Chif Dir. Gen. Ronald Dela Rosa na igwang ‘palit-ulo’ sa PNP alaga ini an pagtatao nin hababang sintensya sa mga madadakop na drug personality karibay kan impormasyon manungod sa transaksyon ninda sa iligal na droga.
