NAGA CITY- Narescue kan mga otoridad an apat na mga menor de edad mantang arestado man an tolong mga suspek makalihis an pigkondusir na entrapment operation sa ciudad nin Lucena.
Sa nagunong impormasyon kan Bombo Radyo Naga, napag-araman na pigkondusir an entrapment operation sa laog nin sarong fast food chain sa barangay 4 sa nasambitang ciudad na nagresulta sa pagkakadakop kan tolong suspek kabale na an 16-anyos na solterito.
Narescue man kan mga otoridad an sarong solterito asin tolong mga daragita.
Sinasabing imbwelto an tolong suspek sa sex trade business kun saen nagseserbe sinda mga bugaw mantang prostitute man an apat na mga menor de edad.
Basado sa inisyal na imbestigasyon kan mga otoridad, nirecruit suboot kan mga suspek an apat na biktima tanganing maglaog sa sex trade business asin pigpromesahan an mga ini na tatawan nin kwarta.
Haros sarong bulan pa sana suboot na magkakabistado an mga biktima asin an tolong suspek.
Nagtitinir na ngonyan sa kostudiya kan mga otoridad an duwang suspek mantang naiturn-over na sa opisina kan Municipal Social Welfare and Development (MSWD) an limang mga menor de edad.
