NAGA CITY- Arestado an sarong lalaki makalihis na magpamalo-malo na kagawad nin media asin nagpabistong empleyado kan sarong radio station sa ciudad nin Naga.
Sa entrevista kan Bombo Radyo Naga ki Romar Vasquez, chairman kan Kapisanan ng mga Broadcaster ng Pilipinas (KBP) Camarines Sur chapter, sinaysay kaini na nadakop sa Bicol Medical Center (BMC) an suspek na si Gestoni Morales alyas George Mendoza na nagpabistong sarong area marketing manager.
Ginagamit suboot kan suspek an simbahan asin an radio station na pigmamanehar ni Vasquez para sa saiyang iligal na gibo.
Sigon ki Vasquez, modus kan suspek na maghagad nin solicitation sa nagkapirang mga ahensya kan gobyerno asin mga establisimiento para sa sarong misa na ila-live suboot sa nasambitang radio station.
Katakod kaini, nakaandam si Vasquez na sunadan nin maninigong kaso an nasambitang suspetsado.
Enot pa kaini, naarestar naman suboot an suspek kan taong 2009 sa banwaan nin Bombon huli sa kaparehong iligal na gibo.
