NAGA CITY- Pinauranan nin bala kan pigtutubudang mga miyembro kan rebeldeng New People’s Army (NPA) an sarong temporary patrol base kan mga militar sa Lagonoy, Camarines Sur.
Sa nagunong impormasyon kan Bombo Radyo Naga, napag-araman na pinauranan nin bala kan pigtutubudang pitong mga miyembro kan rebeldeng NPA an temporary patrol base kan Alpha Company kan 9th Infantry Division, Philippine Army na nakabase sa Gawad Kalinga sa barangay Binanuahan sa nasambitang banwaan.
Naghaloy nin haros 15 segundo an insidente asin mayo man napabaretang nairido sa tropa nin gobyerno mantang tulos man na nagdulag an mga rebelde.
Mientrastanto, para man sa lado kan militar, kinokonsiderar sana ninda an pangyayari komo sarong insidente nin indiscriminate firing.
Posible man suboot na parte an nasambitang aktibidad sa pagselebrar ngonyan kan anibersaryo kan makawalang grupo.
