NAGA CITY- Arestado kan mga otoridad an walong persona makalihis na maaktuhan na naggagamit nin iligal na droga sa laog nin hotel sa ciudad nin Lucena.
Sa nagunong impormasyon kan Bombo Radyo Naga, napag-araman na pigkondusir kan mga otoridad an buy-bust operation sa laog kan sarong hotel sa barangay 4 sa nasambitang ciudad na nagresulta sa pagkakaarestar kan suspek na si Romeo Ederon, 37-anyos.
Nakumpiskar sa suspek an limang sachet nin shabu na maabot an kantidad sa labi sa P16,000.
Pinurbaran pa kuta ng magdulag kan suspek asin naglaog sa sarong kwarto sa nasambitang hotel.
Digdi na naaktuhan an pitong persona kabale na an 17-anyos na solterito mantang nagpa-pot session.
Narekober sa mga ini an duwang sachet nin shabu asin sachet nin alanga na dahon nin marijuana.
Nagtitinir na ngonyan sa kostudiya kan mga otoridad an nasambitang mga suspek mantang inaandam na an kasong isasangat laban sa mga ini.
