NAGA CITY- Gadan an sarong padre de pamilya mantang narescue man an saro pa makalihis na malamos sa Bagasbas Beach sa banwaan nin Daet, Camarines Norte.
Binisto an nagadan na si Richard Cole, 37-anyos na hale sa Davao Del Sur mantang narescue man si Romeo Añana na parehong mga empleyado kan ESCO Tech Corporation.
Sa nagunong impormasyon kan Bombo Radyo Naga, napag-araman na naglalangoy an mga biktima sa dagat kan bigla na sana sindang tamaan nin makukusog na hukol na nagresulta sa saindang pagkalamos.
Tulos man na nagresponde an mga naka-duty na life guards sa lugar asin dinalagan sa ospital an mga biktima alagad pigdeklarar ng dead on arrival kan mga doktor si Cole mantang tulos man na pigbulong si Añana.
Sa ngonyan, nagpaparahay pa sa ospital si Añana mantang nagpapadagos pa an imbestigasyon kan mga otoridad sa pangyayari.
