NAGA CITY- Nagpaparahay pa hasta sa ngonyan sa ospital an duwang soldados na nairido makalihis an nangyaring engkwentro sa sitio Pahimuan, Barangay Lumutan, General Nakar, Quezon.
Sa entrevista kan Bombo Radyo Naga ki Major Gil Perez, an tagapagtaram kan Southern Luzon Command (SOLCOM), sinaysay kaini na yaon na sa marhay na kamugtakan an duwang soldados na binistong sinda Sgt. Franklin Peralta asin Cpl Ruben Pauig.
Nakatalaan naman suboot na ibalyo an nairidong mga soldados sa 2nd Infantry Division, Philippine Army Station Hospital sa Tanay, Rizal.
Narekober man sa pinangyarihan kan engkwentro an mga basyo nin bala asin mga gamit na pagsasadiri suboot kan mga rebelde.
Sigon ki Perez, mahigot nindang binabantayan an banwaan nin General Nakar huli naman ta ini an boundary province pasiring sa Northern Luzon asin kadakol man suboot an mga armadong grupo na nagbabalyo digdi hale sa ibang mga banwaan.
Mientrastanto, maabot man suboot sa labi sa 200 an mga rebeldeng NPA an presenteng aktibo sa mga banwaan na sakop kan Southern Luzon Command.
