NAGA CITY- Mahigot na binabantayan ngonyan kan Southern Luzon Command (SOLCOM) asin kan mga militar an mga lugar na igwang nairehistrong engkwentro laban sa mga rebeldeng New People’s Army (NPA) kan nakaaging mga aldaw.
Sa entrevista kan Bombo Radyo Naga ki Major Gil Perez, tagapagtaram kan SOLCOM, sinaysay kaini na mahigot na binabantayan kan mga soldados an mga lugar na igwang nairehistrong engkwentro kan nakaaging aldaw arog na sana sa banwaan nin Sipocot, Camarines Sur, sa Guinobatan, Albay asin sa General Nakar, Quezon.
Padagos suboot an ginigibong operasyon kan mga militar laban sa mga makakawalang grupo.
Katakod kaini, sigon ki Perez, sa laog nin labi sa 50 aldaw na operasyon kan militar, 28 na an nairehistrong engkwentro laban sa rebeldeng NPA, nakarekober na sinda nin 45 mga armas asin nag-abot naman sa 39 mga rebelde an saindang na-neutralize.
Pigkakarkulong maabot naman suboot sa labi sa 200 an mga miyembro kan rebeldeng NPA sa mga banwaan na sakop kan Southern Luzon Command.
