NAGA CITY- Gadan an apat na persona makalihis an nangyaring karambola nin tolong lunadan sa barangay Ayugan, Ocampo, Camarines Sur.
Sa entrevista kan Bombo Radyo Naga ki PO3 Gregory Valiente, hale sa PNP Ocampo, sinaysay kaini na pasiring kuta na sa banwaan nin Lagonoy an pampasaherong Florencia bus na minamaneho ni Antonio Aguedan kan aksidente digding magsalpok an tricycle na minamaneho ni Ricardo Arce.
Basado sa inisyal na imbestigasyon kan mga otoridad, nag-overtake an tricycle sa sarong truck na minamaneho man ni Diolito Reambonanza sa nasambitang lugar antes na magsalpok sa kasabatan na pampasaherong bus.
Nagsapo nin lugad sa saindang lawas an driver kan tricycle siring man an tolong lunad kaini na binistong sinda Dominick Brandes, Mark Patrick Nicko Molina asin Fredrick Ace Henry Arce.
Sigon ki Valiente, huli sa kusog kan nangyaring banggaan, nakaapon pa an mga lunad kan tricycle asin duwa sa mga ini an naligis pa kan truck na nagresulta sa saindang tulos na kagadanan.
Sa suway man na pakikipag-olay sa mismong hepe kan PNP Ocampo na si PC/Insp. Stephen Cabaltera, sinaysay kaini na paramientras na ipinasara an tinampo sa barangay Ayugan huli sa pangyayari.
Nagtitinir na ngonyan sa kostudiya kan mga otoridad an driver kan truck asin pampasaherong bus na imbwelto sa aksidente mantang yaon na sa sarong punerarya an bangkay kan apat na nagadan na mga persona.
