NAGA CITY- Mahigot na pinahimutikan kan manhamiento kan 9th Infantry Division, Philippine Army an sinasabing harassment asin intimidation suboot na ginibo kan mga soldados sa nagkapirang mga school publication sa Camarines Sur.
Sa pakikipag-olay kan Bombo Radyo Naga ki Capt. Randy Llunar, an bagong chief kan Division of Public Affairs Office (DPAO), sinaysay kaini na ikinamundo ninda an sahot kan College Editors Guild of the Philippines (CEGP) sa suboot harassment kan mga soldados sa mga estudyante asin miyembros kan school publication na ‘The Pillars’ kan Ateneo de Naga University (ADNU) asin kan ‘The Nexus’ ng Baao Community College (BCC).
Klaro man suboot na mga nakasibilyan na pulis an imbwelto sa pangyayari asin bakong mga soldados.
Nagtutubod man si Llunar na posibleng parte kan propaganda kan Communist Party of the Philippines – New People’s Army – National Democratic Front (CPP-NPA-NDF) an nasambitang isyu asin obheto kaini na rauton an imahe kan Philippine Army.
Enot pa kaini, nagpaluwas nin pahayag an CEGP manungod sa saindang pagkondenar sa sinasabing harassment asin pagkonektar pa suboot kan mga militar sa mga miyembro kan nasambitang mga school publications sa rebeldeng NPA.
Sinasaysay man kan CEGP na nagpaluwas suboot nin memorandum an manhamiento kan Armed Forces of the Philippines (AFP) asin kan Philippine National Police (PNP) sa rehiyon tanganing magkaigwa nin imbestigasyon sa mga student publications sa kabikulan.
