NAGA CITY- Nanindugan an College Editors Guild of the Philippines (CEGP) na nagkaigwa nin insidente nin harassment sa sarong school publication sa banwaan nin Baao, Camarines Sur.
Sa ekslusibong entrevista kan Bombo Radyo Naga ki Joanne Villanueva, an CEGP Region 5 Chairperson, sinaysay kaini na kinokonsiderar nindang harassment an nangyaring pagpasiring kan duwang nagpabistadong nakasibilyang pulis sa Baao Community College (BCC).
Ini makalihis na maghapot suboot an duwang pulis manungod sa mga student journalist na nagpartisipar sa pigkondusir na Luzon wide conference kan CEGP na Lunduyan na nagpoon kan Abril 5 hasta 9.
Nagdara suboot nin pagkaalarma sa mga miyembro kan ‘The Nexus’ an official school publication kan BCC an pagpasiring kan duwang pulis sa saindang eskwelahan.
Tinawan doon ni Villanueva na mayong pulis an biglaan na sanang mapasiring sa sarong eskwelahan tanganing maghapot nin impormasyon manungod sa sarong aktibidad.
Tinawan doon man ni Villanueva na sarong legal na organisasyon an CEGP asin saro ining demokratikong alyansa na mayong kinaaraman sa makawalang grupo.
Napag-araman na apwera sa nasambitang harassment sa rehiyong Bicol, igwa man suboot kaparehong insidente sa parte kan Pangasinan.
