NAGA CITY- Nagpasiring na sa probinsya nin Antique an huring batch kan mga delegado hale sa rehiyong Bicol para sa Palarong Pambansa 2017.
Sa entrevista kan Bombo Radyo Naga ki Mark Kevin Arroco, project manager II kan Department of Education (DepEd) Bicol, sinaysay kaini na kaibanan niya an 94 na mga atleta para sa special events na nagpasiring ngonyan na aldaw, Abril 20 sa Antique.
Naenot na sa nasambitang probinsya an labi sa 600 na mga delegado hale sa rehiyong Bicol na malaban man sa regular events kan nasambitang pakawat.
Sigon ki Arroco, dakulang bentahe man para sa mga atleta hale sa kabikolan na harani an billeting center kan region 5 sa playing venue tanganing mas pasil na makapag-training.
Mientrastanto, target ngonyan kan Region 5 na makalaog sa top 5 kan Palarong Pambansa 2017 urog na ngonyan na mas pinahigot pa an mga training kan mga atleta.
Sa maabot na Domingo, Abril 23 nakatalaan ng pormal na magpoon an 60th Palarong Pambansa na pigkokonsiderar na pinakadakulang sporting event sa Pilipinas.
