NAGA CITY- Pigtuga kan ina ni P/Supt. Maria Christina Nobleza na nakulgan siya kan maaraman niya an bareta na imbwelto suboot an saiyang aki sa bandidong grupong Abu Sayyaf.
Sa ekslusibong entrevista kan Bombo Radyo Naga ki Rosenda Brugada, ina ni Nobleza hale sa barangay Filarca, Tinambac, Camarines Sur, sinaysay kaini na komo sarong ina, nakukulgan siya sa mga pigdadaklag na alegasyon sa saiyang matuang aki.
Sarong maboot asin mataling aki si Nobleza o mas bistado suboot sa apod na ‘Tintin’ asin nakagradwar ini komo Magna Cum Laude sa kursong criminology.
Sigon ki Brugada, haros apat na taon naman na suway si Tintin sa saiyang esposo na sarong police attache sa Pakistan.
Mientrastanto, tinawan doon ni Brugada na dae muna husgaran an saiyang aki katakod kan bareta manungod sa saiyang relasyon suboot sa sarong bandidong Abu Sayyaf.
Hagad ngonyan ni Brugada na magkaigwa nin patas asin pantay na imbestigasyon para sa saiyang aki asin magluwas naman an katotoohan digdi.
Enot pa kaini, sinaysay man kan sarong dating maestro ni Nobleza sa sarong kolehiyo sa ciudad nin Naga kun saen siya nagklase na sarong matali asin madaling makagianan nin boot an nasambitang police colonel.
