NAGA CITY– Plano na magpasiring kan pamilya ni P/Supt. Maria Christina Nobleza sa Kampo Krame tanganing bisitahon an nasambitang police colonel.
Sa ekslusibong entrevista kan Bombo Radyo Naga ki Rosenda Brugada, ina ni Nobleza hale sa barangay Filarca, Tinambac, Camarines Sur, sinaysay kaini na dae pa sinda nagkakaolay kan saiyang aki poon kan magputok an nasambitang bareta sa relasyon suboot kaini sa sarong miyembro kan bandidong grupong Abu Sayyaf.
Plano niya asin kan mga tugang ni Nobleza na magpasiring sa Kampo Krame sa Quezon City tanganing personal na mahiling an saiyang aki na presenteng nakakarsel sa PNP Costudial Facility.
Bilog man an pagtubod ni Brugada na ginigibo sana kan saiyang aki an trabaho kaini komo sarong pulis asin pinoprotehiran sana kaini an sinasabing boyfriend niya na miyembro kan ASG na si Renierlo Dongon tanganing makakua nin importanteng mga impormasyon manungod sa mga plano kan nasambitang grupo.
Tinawan doon man ni Brugada na kun totoo man na igwang relasyon si Nobleza asin Dongon, diretsos man suboot kan saiyang aki na maging maugma.
Nagwalat man nin mensahe si Brugada para sa saiyang aki na si Tintin na padagos sana na magtubod sa Kagurangnan sa tahaw kan saiyang kinakahampang na kontrobersiya.
Enot pa kaini, sinaysay man ni Brugada na komo sarong ina, nakukulgan siya sa pigdadaklag na alegasyon laban sa saiyang matuang aki.
