NAGA CITY- Arestado kan mga otoridad an mag-agom na suspek asin an supplier suboot kan mga ini nin droga makalihis an pigkondusir na anti-illegal drug operation sa Bula, Camarines Sur.
Sa pakikipag-olay kan Bombo Radyo Naga ki PC/Insp. Dino Ben Regaspi, hepe kan PNP Bula, sinaysay kaini na nadakop sa pigserbeng search warrant sa barangay Ombao Polpog an mag-agom na suspek na sinda Rene asin Liezel Parra.
Kabale man sa mga pigdakop kan mga otoridad an sarong negosyante na si Narciso Sopeña, 65-anyos, residente kan barangay Lawa, Calamba, Laguna na sinasabing supplier nin iligal na droga kan mag-agom na Parra.
Sigon ki Regaspi, enot ng nagsuko sa programang Oplan Tokhang kan PNP an nasambitang mag-agom.
Narekober sa pag-iingat kan mga suspek an sarong medium size sachet kan pigtutubudang shabu asin mga drug paraphernalia.
Sa ngonyan, nagtitinir na sa kostudiya kan mga otoridad an nasambitang mga suspek mantang inaandam na an kasong isasangat laban sa mga ini.
