NAGA CITY– Tadtad nin bala nin baril asin mayo na nin buhay kan makua an sarong Cafgu makalihis ratraton kan dae pa nabibistong mga suspetsado sa Barangay Villasocoro, Libmanan, Camarines Sur.
Binisto an biktima na si CAA Nestor Musa, 53-anyos, miembro kan Cambalidio Patrol Base, 22IB, 9th Infantry Division, Philippine Army.
Sa entrevista kan Bombo Radyo Naga ki PO2 Emyrose Organis, tagapagtaram kan Libmanan-PNP, sinaysay kaini na nagluwas sa saindang kampo si Musa para magbakal nin tubig alagad dae na ini nakaabot pa kan tambangan kan armadong mga suspek.
Sigon ki Organis, nagsapo nin tama nin bala kan baril si Musa sa saiyang payo asin manlaen laen na parte pa kan lawas na nagin rason kan saiyang tulos na pagkagadan.
Sa ngunian, nagpapadagos pa an imbestigasyon kan mga otoridad dapit sa nasambitan ng panggagadan.
