NAGA CITY- Prangkang sinaysay kan miyembro kan Gabriela Party-list na dae maninigo na maging senador kan Pilipinas si Sen. Tito Sotto.
Ini makalihis an ginibo kaining pagsusuba suboot manungod sa pagiging sarong solo parent ni Department of Social Welfare and Development (DSWD) Sec. Judy Taguiwalo sa katahawan kan confirmation hearing kan Commission on Appointments (CA).
Sa entrevista kan Bombo Radyo Naga ki Nelsy Rodriguez kan Gabriela Party-list, sinaysay kaini na kinakaipuhan na mag-public apology ni Sotto huli sa ginibo kaining pambabastos asin dae pag-respeto ki Sec. Taguiwalo.
Dae suboot maninigo na maging senador an sarong tao kun nambabasto ini nin sarong babae.
Katakod kaini, mahigot na kinokondenar man kan saindang grupo an pahayag kan nasambitang senador.
Sigon ki Rodriguez, kinakaipuhan na makanuod si Sotto kun saen asin nuarin ini dapat na magsuba huli naman ta saro suboot na pormal na pagtiripon an confirmation hearing ni Sec. Taguiwalo.
Nagtutubod man si Rodriguez na dae nagsusuba an senador kan butasan kaini an saiyang mga pahayag manungod sa mga solo parent.
Tinawan doon man kan Gabriela Party-list na dapat na irespeto kan mga Pilipino an mga kababaihan asin ang mga solo parent sa nasyon.
