(UPDATE) NAGA CITY- Nagpromesa an bagong tukaw na alkalde sa banwaan nin Baao, Camarines Sur na ipapadagos niya an napunan na magagayon na programa kan nadismiss na si Mayor Mel Gaite.
Sa entrevista kan Bombo Radyo Naga ki Baao Mayor Jeffrey Besinio, sinaysay kaini na ipapadagos niya an mga napunan na programa ni Gaite urog na an mga nakakatabang sa mga namamanwaan sa saindang banwaan.
Tinawan doon man kan alkalde na dae hahaleon sa pwesto an mga job order employees sa munisipyo suway sa paghandal kan nagkapirang mga empleyado.
Magiging prayoridad man ni Besinio ngonyan an pagtatao nin programa para sa manlaen laeng sektor kan sosyudad asin an pagkakaigwa nin mga livelihood programs.
Aminado si Besinio na dakulang pagbabago para sa saiya an pagiging sarong alkalde alagad malalaoman suboot an saiyang dobleng pagtatrabaho para sa mga namamanwaan sa banwaan nin Baao.
Si Besinio an nagsalida ki Gaite makalihis na iserbe na kan nakaaging aldaw an dismissal order laban sa dating alkalde.
Mientrastanto, sigon ki Besinio, nakaolay na niya si Gaite asin hinahalat na sana suboot kan lado kaini an kasimbagan kan Office of the Ombudsman katakod kan pigsunad na motion for reconsideration sa nasambitang dismissal order.
