(UPDATE) CITY- Inagyat kan mismong chief of police kan PNP Buhi sa probinsya nin Camarines Sur an incumbent barangay kagawad na saindang naarestar sa anti-illegal drug operations suodma na patotoohan an saiyang alegasyon na ‘tanim-droga’ sa laog nin korte.
Sa entrevista kan Bombo Radyo Naga ki PC/Insp. Edgar Callada, hepe kan PNP Buhi, sinaysay kaini na depensa sana kan akusado na si Benjie San Juan, kagawad kan barangay Burocbusoc an sinasabing nagkaigwa nin ‘tanim-droga’ o an pagtatanom nin ebidensya kan mga otoridad.
Sa korte na sana suboot sinda maghampangan asin digdi isaysay ni San Juan an saiyang mga akusasyon sa linyada kan PNP.
Prangkang sinaysay kan opisyal na imposibleng gibuhon kan mga kapulisan an nasambitang bagay huli naman ta mayo man sindang darang shabu asin dae man sinda naggagamit nin sumpak.
Enot pa kaini, ikinabigla suboot kan suspek na si San Juan na igwang nakuang sarong wallet na naglalaog nin sachet kan pigtutubudang shabu sa saiyang bag.
Dae niya man pagsasadiri suboot an nasambitang wallet asin nagtutubod siya na nabiktima sana siya kan inaapod na tanim-droga.
Marurumduman na nadakop an high value target na si San Juan asin an bigtime drug pusher na si Nelson Serrano makalihis an operasyon sa barangay Burocbusoc sa banwaan nin Buhi, Camarines Sur suodma.
Narekober sa saindang pag-iingat an haros 30 sachet nin pigtutubudang shabu, haros 50 mga bala asin badil.
