NAGA CITY- Liwat na sinariwa ni Vice President Leni Robredo an buhay kan saiyang depuntong esposo na si dating Interior secretary Jesse Robredo.
Ini katakod kan pagselebrar kan ika-59 kompleanyo kan nasambitang opisyal ngonyan na aldaw.
Sigon sa bise presidente, ikinaugma niya an pagpapadagos kan nagkapirang mga opisyal sa ciudad nin Naga sa mga nawalat na programa ni Sec. Jesse dawa na haros halos limang taon na ining namaaram sa kinaban.
Naglalaom man si Vice President Robredo na tuyong maabot an kompleanyo kan saiyang depuntong esposo, ipagpapasalamat kan mga tao an insipirasyon asin marhay na nagibo kaini.
Mientrastanto, sigon sa bise presidente, nagtutubod siya na pirming yaon sa saiyang kataid si Sec. Jesse tanganing magtao nin giya sa saiyang trabaho komo ikaduwang presidente kan nasyon asin sa saindang pamilya.
Nagkaigwa nin misa sa lulubngan ni Sec. Jesse sa Eternal Gardens sa Naga City na inatendiran kan hararaning amigo asin kaparyentes kan pamilya Robredo.
Makalihis an nasambitang misa, nagpasiring man si Vice President Robredo sa iba pa kaining mga aktibidad na kaipuhan na atendiran sa probinsya nin Camarines Sur.
