NAGA CITY- Inireklamo an sarong district supervisor kan Department of Education (DepEd) makalihis na magpabistadong pulis asin saro suboot na abogado asin nagparibok pa sa Bicol Central Station.
Sa nagunong impormasyon kan Bombo Radyo Naga, napag-araman na inireklamo ni Rolando Olazo, 39-anyos, sarong konduktor nin pampasaherong bus an lalaki na si Nilo Odi, 57-anyos, district supervisor kan DepEd sa probinsya nin Camarines Norte.
Basado sa istorya ni Olazo, naglunad suboot an mag-agom na Odi sa bus na byaheng Naga-Manila alagad naanggot suboot an suspek makalihis na pabalyuhon niya ini nin lunadan huli naman ta pano na an nasambitang bus.
Digdi na suboot nagparibok si Nilo asin hinumaan pa an konduktor na gagapuon an bus kun dae sinda papasakayon ng saiyang esposa.
Nagpabistado pa suboot na pulis si Nilo asin saro man na abogado.
Tulos man na dinara kan mga kapulisan an suspek sa saindang hepatura asin digdi na nagpaliwanag an esposa kaini na si Maxima, 61-anyos, paratukdo sa Rizal Elementary School sa Sta Elena, Camarines Norte.
Sigon ki Maxima, igwang helang sa pag-iisip an saiyang esposo kaya man naghahagad ini nin dispensa sa pangyayari.
