Sapat pa an suplay nin dugo sa Philippine Red Cross Camarines Sur Chapter sa ngunyan, sa ibong kan mga kaso kan dengue asin sunod-sunod na aksidente na posibleng manginahanglan nin blood transfusion.
Sa intrevista kan Bombo radyo Naga ki Maria Felisa Badiola-Philippine Red Cross Camarines Sur Chapter, sinabi kaini na sa ngunyan sapat pa an mga dugo na igwa sinda asin pirme man na bukas an saindang opisina sa mga pasyenteng nangangaipuhan nin dugo.
Segun ki Badiola para sa mga nangangaipuhan nin dugo, kaipuhan man na magkaigwa nin request hale sa ospital na naglalaman kan ngaran kan pasyente, blood type, asin blood component na kaipuhan kaini. An pagtao nin dugo nakadepende sa aktuwal na pangangaipo kan pasyente asin sa availability kan suplay sa ospital.
Dugang pa ni Badiola, pwede man direktang mag-approach sa opisina kan Philippine Red Cross Camarines Sur Chapter an mga nangangaipuhan nin dugo para sa angay na asistencia.
Tg-eenkaminar man an publiko na magdonate nin dugo kun sain pwedeng mag-walk in sa saindang opisina, na pirming bukas para sa mga boluntaryong donor.
Pinagirumduman kaini na bako lang sa mga taga Naga maging sa gabos na taga Camarines Sur na para maiwasan an dengue maglinig kan kapalibutan ta gabos nagpopoon sa satuyang sadiri asin sa harong. Tabangan an komunidad para dae na maglakop an dengue.
Mientrastanto, igwa man nin ordinansa sa Naga City na nagtatao nin opsyon sa mga nagbubusisi sa mga paglapas sa batas trapiko na magdonate nin dugo imbes na magbayad nin multa, segun sa itinakda kan ordinansa.
