NAGA CITY- Nagsabog an sarong pigtutubudang improvised explosive device (IED) sa banwaan nin Goa, Camarines Sur, alas-5:30 nin aga ngonyan na aldaw.
Sa entrevista kan Bombo Radyo Naga ki Capt. Randy Llunar, chief, Division of Public Affairs Office (DPAO) kan 9th Infantry Division, Philippine Army, sinaysay kaini na nagsabog an nasambitang IED sa barangay Pinaglabanan mantang nag-aagi an military truck lunad an mga soldados hale sa Alpha Company.
Pasiring kuta na sa patrol base sa barangay Hiwacloy an nasambitang grupo kan mga soldados kan mangyari an pagsabog.
Sigon ki Llunar, premature an pagsabog kan nasambitang IED kaya swerteng mayong natamaan sa lado kan pamahalaan sa pangyayari.
Nagtutubod man an opisyal na an mga soldados an target kan nasambitang pagsabog.
Sa ngonyan, nagpapadagos pa an imbestigasyon kan mga militar katakod kan nangyaring pagsabog sa nasambitang lugar.
