NAGA CITY- Arestado kan mga kabuhan kan Criminal Investigation and Detection Group (CIDG) an duwang persona na pigtutubudang miyembro kan bagong criminal group sa Camarines Sur.
Sa entrevista kan Bombo Radyo Naga ki PC/Insp. Ronnie Fabia, provincial officer kan CIDG-Camarines Sur, sinaysay kaini na nadakop an mga suspek na sinda Alex Del Ayre na nagre-repair nin mga badil asin an sinasabing supplier kaini na si Lino Agudia, 59-anyos na hale pa sa Negros Occidental.
Nangyari suboot an transaksyon sa laog mismo kan gunshop ni Del Ayre sa ciudad nin Naga asin digdi na nakumpiskar an 16 na manlaen laeng klase nin mga badil na mayong mga lisensya.
Hale pa suboot sa Visayas region an mga badil na dinadara asin sinu-supply sa Camarines Sur.
Sigon ki Fabia, miyembro an naturang mga suspek sa newly identified Lino Agudia criminal group na sinasabing imbwelto sa nagkapirang mga insidente nin pambabadil sa nasambitang probinsya.
