NAGA CITY- Pinahimutikan kan manhamiento kan 902nd Infantry Brigade kan 9th Infantry Division, Philippine Army an nagluwas na impormasyon na pinasabugan kan mga rebelde an piglulunadang military truck kan mga soldados sa Labo, Camarines Norte.
Sigon ki Col. Boots Regencia, Deputy Commander kan 902 Infantry Brigade, sinaysay kaini na bakong totoo an impormasyon na tinamaan nin landmine an lunadan kan mga soldados hale sa 9th Infantry Battalion mantang pasiring an mga ini sa barangay Dumagmang kun saen igwa suboot nangyayaring bakbakan.
Sigon ki Regencia, nakadangog sinda nin makusog na pagsabog na pinagtutubudang sarong landmine asin padagos pa nindang inaaram kun saen ini mismong pinasabog.
Propaganda asin pananakot sana suboot kan mga rebeldeng New People’s Army (NPA) an nasambitang impormasyon na tinamaan kan landmine an mga soldados.
Mayo man nairehistrong nairido o nagadan sa nangyaring pagsabog.
Mientrastanto, nagtutubod man si Regencia na nananakot sana an mga rebelde huli sa pagtubod na maluya na an pwersa ngonyan kan mga militar sa Camarines Norte huli naman sa ipinadarang re-enforcement na mga soldados sa parte kan Marawi City.
Katakod kaini, pigsierto kan 902IB na nakaandam an saindang pwersa sa anuman na mga pang-aatake kan makawalang grupo.
