Pigdeni ni Presidente Ferdinand Marcos Jr. an mga akusasyon na an saiyang administrasyon an nasa likod kan kampanya tanganing rautan si Bise Presidente Sara Duterte, asin hinamon niya ini na magpresentar nin ebidensya.
Ini kasunod kan akusasyon ni Bise Presidente Duterte na an administrasyon an may kinalaman sa mga pahayag ni Rodulfo Gracioso Jr., sarong sinibak na pulis na nag-aako na naghahatod siya nin dakulang kantidad nin kwarta sa bise presidente asin sa saiyang pamilya.
Idinugang kan Presidente na kaipuhan munang mailatag an mga ebidensya asin matukoy an katotoohan bago magkonklusyon manungod sa mga alegasyon laban sa siisay man na opisyal kan gobyerno.
Segun man ni Marcos na dai niya masyadong sinusubaybayan an mga isyung politikal na imbwelto si Duterte, kaiba na an impeachment proceedings, huli ta nakatutok siya sa pagganap kan saiyang mga katungdan bilang presidente.
Pignilinaw niya na an saiyang paggamit kan tataramon na “buwaon” (sinungaling) bakong para ki Duterte kundi reaksyon niya sa suhestiyon na amyendahan an Konstitusyon tanganing kanselahon an eleksyon.
Idinugang ni Marcos na garo nagkaigwa nin dai pagkakaintindihan kan ipresentar kan sarong Palace press officer an saiyang komento manungod sa “buwaon” bilang reaksyon laban ki Duterte, asin pinilinaw na bakong opisyal na pahayag ini para sa publiko.
