(UPDATE) NAGA CITY- Kritikal pa nanggad an kamugtakan kan sarong soldados na nairido sa nangyaring bakbakan sa Labo, Camarines Norte.
Sigon ki Capt. Randy Llunar, chief, Division of Public Affairs Office (DPAO), 9th Infantry Division, Philippine Army, ipinadara na sa V. Luna General Hospital sa Quezon City an dae pa pinapangaranang soldados tanganing maipabulong.
Tinamaan nin shrapnel sa saiyang lawas an nasambitang soldados siring man an iba pa kaining mga pag-iriba makalihis na pasabugan sinda nin mga molotov bomb kan pinagtutubudang miyembro kan rebeldeng New People’s Army (NPA).
Nagpaparahay naman suboot sa ospital an tolo pang mga soldados na nairido sa nangyaring bakbakan sa barangay Dumagmang sa nasambitang banwaan.
Mientrastanto, nagsayuma muna na isapubliko kan 9ID an pangaran kan soldados na enot ng napabaretang binawian nin buhay siring man an apat na nairidong mga soldados sa nangyaring bakbakan sa Camarines Norte.
