NAGA CITY- Tinambangan kan pinagtutubudang mga miyembro kan rebeldeng New People’s Army (NPA) an military truck kan mga soldados sa Lupi, Camarines Sur.
Sa entrevista kan Bombo Radyo Naga ki Capt. Randy Llunar, chief, Division of Public Affairs Office (DPAO), 9th Infantry Division, Philippine Army, sinaysay kaini na alas-10 nin banggi suodma mantang pasiring kuta na sa Labo, Camarines Norte an mga soldados hale sa patrol base sa Pag-oring, Libmanan kan tambangan sinda kan mga rebelde sa barangay Alanao sa banwaan nin Lupi.
Matabang kuta na an nasambitang mga soldados hale sa banwaan nin Libmanan sa nagpapadagos na military operation sa probinsya nin Camarines Norte makalihis an nangyaring bakbakan digdi.
Nagtutubod man sinda na sarong landmine an pinasabog kan mga rebelde.
Maswerte man na mayong nairehistrong nairido sa mga soldados asin solamenteng an military vehicle sana kan mga ini an napuruhan kan magsabog an landmine.
Katakod kaini, pigsierto man ni Llunar an local peace and order sa rehiyong Bicol sa ibong kan nairehistrong mga pang-a-atake kan makawalang grupo.
