Pag-atake sa patrol base sa CamNorte, pinagplanuhan kan mga NPA susog sa Phil. Army
(UPDATE) NAGA CITY- Nagtutubod an manhamiento kan 9th Infantry Division, Philippine Army na planado an nangyaring pag-atake kan mga rebeldeng New People’s Army (NPA) sa patrol base kan militar sa Labo, Camarines Norte.
Sigon ki Capt. Randy Llunar, chief, Division of Public Affairs Office (DPAO) kan 9ID, pinagplanuhan kan mga rebelde an nasambitang pang-a-atake tanganing makabalos sa mga soldados hale sa 9th Infantry Battalion makalihis na makubkob kan mga ini an kampo kan mga rebelde sa banwaan nin Del Gallego, Camarines Sur kan bulan nin Abril.
Tinawan doon pa ni Llunar na posibleng pinoprotehiran kan mga NPA an barangay Dumagmang huli naman ta saro ining mining area asin apektado na an saindang mga operasyon sa lugar kaya piglunsar kan mga ini an nasambitang pang-a-atake.
Katakod kaini, pigsierto kan opisyal na mayong naipit na mga sibilyan sa haros sarong oras na nangyaring bakbakan huli naman ta harayo an patrol base kan 9IB sa mga residente.
Sa ibong kaini, nagdara man nin paghandal sa mga residente sa lugar an nangyaring engkwentro na nagresulta sa pagkagadan kan sarong soldados asin an pagkairido kan apat na iba pa.
