NAGA CITY- Arestado kan mga kapulisan an duwang persona kabale na an sarong aktibong ley minister makalihis an pigkondusir na drug raid sa banwaan nin Baao, Camarines Sur.
Binisto an mga naarestar na suspek na sinda Ewilfred Boreta asin Kenneth Baita, 43-anyos na sarong ley minister mantang nagtitinir pang at-large an suspek na si Jesus Barela alyas Tikling.
Sigon ki SPO4 Alvin Badong, an tagapagtaram kan PNP Baao, enot na pigserbe kan mga kapulisan an search warrant sa harong ni Baita sa barangay San Ramon asin nakumpiskar digdi an pitong sachet na naglalaog nin pinagtutubudang shabu.
Sunod na pigkondusir an drug raid sa harong ni Boreta asin nakumpiskar digdi an limang sachet nin pinagtutubudang iligal na droga.
Dae man inabutan kan mga kapulisan an suspek na si Barela alagad narekober sa harong niya an limang sachet nin shabu asin mga drug paraphernalia.
Padagos pa ngonyan an pigkokondusir na operasyon kan mga kapulisan tanganing madakop an nakadulag na suspek na si Barela mantang inaandam na an kasong isasangat laban sa duwa pang mga suspetsado.
