NAGA CITY- Nagpaluwas na nin direktiba si Vice President Leni Robredo na dugangan an mga personahe na matutok sa spending capacity kan Office of the Vice President (OVP).
Ini katakod kan nagluwas na Commission on Audit (COA) findings na nagsasabing diit sana o nagkaigwa nin underspending an OVP kan nakaaging taon.
Sigon sa bise presidente, kan nakaaging taon, igwa nin kabilugang budget na P219 milyon an saindang opisina para sa financial assistance asin narelease na suboot digdi an P151 milyon mantang nag-abot man sa P130 milyon an saindang nagastos o haros 86% na kan nasambitang budget.
Narisa man suboot kan opisyal na igwa nin pagbaba sa numero kan pagtatao nin financial assistance sa enot na parte kan taong 2016 asin posibleng huli suboot ini sa nakaaging eleksyon.
Tanganing mapakarhay na suboot an pagrelease kan financial assistance kan OVP, pigsugo na ni Robredo na magkaigwa nin dugang na tao na matabang sa pagproseso sa gabos na request manungod sa nasambitang bagay.
Pigtuga man kan bise presidente na nadidipisilan sinda na malapag an pagtatao nin financial assistance huli sa halawig na pila kan mga mawot na matawan kaini.
Sa ibong kaini, nagtutubod man si Robredo na magagamit ninda an pondo asin mairerelease ini para sa mga nagtitios na Pinoy.
