NAGA CITY- Tulos na sinimbag ni Deputy House Speaker Rep. Fredenil Castro an mga pahayag ni Senator Riza Hontiveros katakod kan suboot mga nangyayaring pagbalgar sa diretsos humanos sa mga lugar na yaon sa irarom kan Martial Law.
Sa entrevista kan Bombo Radyo Naga ki Castro, sinaysay kaining mayong basehan an mga alegasyon kan senador na gibo kan mga soldados an mga report na nareresibe kan Commission on Human Rights (CHR) katakod kan suboot human rights violations sa Mindanao.
Sigon ki Castro, an mga terorista an nagbabalgar kan diretsos humanos asin bako man an mga militar.
Enot kaini, prangkang sinaysay ni Hontiveros na igwang nareresibeng impormasyon hale mismo sa CHR katakod kan suboot mga pang-aabuso kan mga militar sa lugar.
Naghuma man an senador na kun mapatotoohan an nasambitan na mga alegasyon sa paagi kan fact-finding tulos ining isusumiter sa senate committee on justice and human rights.
