NAGA CITY- Padagos pa nanggad na piglalapag kan mga kapulisan an sarong padre de pamilya makalihis na tagaon an saiyang sadiring aki sa Calabanga, Camarines Sur.
Binisto an suspek na si Domingo Alcantara.
Sa entrevista kan Bombo Radyo Naga ki PO3 Ridgel Padre, tagapagtaram kan PNP Calabanga, sinaysay kaini na nagppadagos an saindang ginigibong hot pursuit operations tanganing madakop an nasambitang suspetsado.
Enot pa kaini, nag-iiwal suboot an biktima na si Junior Alcantara, 34-anyos asin an saiyang live-in partner sa laog nin ambulansya kan lokal na gobyerno kan Calabanga.
Bigla na sana suboot na nag-abot an suspek asin sa dae pa maaraman na rason, pinagtataga kaini an saiyang aki.
Nagsapo nin lugad sa saiyang likod si Junior na tulos man na pigdalagan sa ospital.
Sigon ki Padre, padagos pa nanggad ngonyan an pursuit operation asin imbestigasyon kan mga kapulisan tanganing maaraman ano an motibo sa insidente.
Pighahalat pa man ngonyan kan PNP Calabanga an pahayag kan biktima tanganing maiandam na an maninigong kaso na isusunad laban sa saiyang ama.
