NAGA CITY- Irido an limang persona kabale na an duwang daragita makalihis an karambola nin apat na bihikulo sa Ragay, Camarines Sur.
Binisto an mga nairido na sinda Visitacion Villarez, 63-anyos; Mary Ann Eranista, 42-anyos; Aiza Postillos, 19-anyos asin an duwang daragita.
Sa nakuang impormasyon kan Bombo Radyo Naga, napag-araman na binabagtas kan kotse na minamaneho ni Estanislao Lasvano, 49-anyos kaibanan an pasahero kaini na si Eranista kan aksidente ining makasalpok sa nakaparadang duwang tricycle asin sarong motorsiklo sa gilid kan tinampo sa barangay Poblacion Iraya.
Nakasalpok pa suboot an nasambitang kotse sa poste nin kuryente antes na nabangga an apat mga biktima na sinda Villarez, Postillos asin an duwang daragita na edad 15 asin 13-anyos.
Nagsapo nin lugad sa saindang lawas an limang nairidong mga indibidwal na tulos man na pigdalagan sa ospital.
Sa inisyal na imbestigasyon kan mga kapulisan, nagluluwas na burat an driver kan kotse na si Lascano kan mangyari an aksidente.
Nagtitinir na ngonyan sa kostudiya kan PNP Ragay an driver kan kotse makalihis na boluntaryong magsuko sa mga kapulisan.
