NAGA CITY – Kinikwestyon ngonyan kan mga otoridad an opisyal kan sarong barangay sa Lopez, Quezon makalihis na dae tulos ipaaram sa mga militar na igwa suboot nin nagtitinir na mga miyembro suboot kan rebeldeng New People’s Army (NPA) harani sa harong kaini.
Sa entrevista kan Bombo Radyo Naga ki Maj. Filven Noche, bagong tagapagtaram kan Southern Luzon Command (SOLCOM), sinaysay kaini na nagkokondusir nin combat operation an mga soldados hale sa 85th Infantry Battalion, Philippine Army sa boundary kan barangay Ilayang Ilog asin barangay Villanacaob kan maka-engkwentro kan mga ini an 20 pigtutubudang miyembro kan rebeldeng grupo.
Makalihis suboot an 30 minutos na bakbakan, nakubkob kan mga militar an sarong temporary encampment kan mga rebelde na kayang mag-accomodar nin maabot sa 40 persona.
Sigon ki Noche, narekober sa lugar an mga improvised explosive device (IED) asin mga detonating wire.
Harani suboot an nasambitang kampo kan mga rebelde sa harong kan dae pa pinapangaranang opisyal kan barangay Ilayang Ilog.
Mientrastanto, nairido man sa nangyaring bakbakan si Cpl. Steve Canabuan na tulos man na pigdalagan sa ospital.
