(UPDATE) NAGA CITY- Dinismiss kan korte an kaso laban sa sarong drug personality na nakuanan nin chocolate flavoured shabu sa pigkondusir na drug raid sa ciudad nin Naga.
Sa entrevista kan Bombo Radyo Naga ki SPO2 Toby Bongon, tagapagtaram kan Naga City Police Office (NCPO), sinaysay kaini na binasura kan korte an kasong possession of illegal drugs na isinangat sa suspek na si Michelle Valencia huli sa nakumpiskar na flavoured shabu sa harong kaini sa barangay Concepcion Pequeña.
Basado suboot sa resulta kan eksaminasyon na pigkondusir kan crime laboratory nagluwas na negatibo an nakumpiskar na iligal na droga kan mga otoridad sa Metamphetamine Hydrochloride o shabu.
Ini suboot an naging basehan para madismiss an nasambitang kaso laban ki Valencia.
Sigon ki Bongon, inaaram pa ninda kun anong klaseng iligal na droga an nakumpiskar sa harong kan suspek na si Valencia.
Tinawan doon ni Bongon na apwera sa operasyon sa barangay Concepcion Pequeña, nakumpiskar man kan mga operatiba an mga flavoured shabu sa sarong drug operation na pigkondusir sa barangay Cararayan na nagresulta sa pagkakadakop kan apat na persona. =
Mientrastanto, sasangatan pa man giraray nin kasong pagbalgar sa Sec. 5 Art 2 kan RA 9165 o comprehensive dangerous drugs act of 2002 an suspek na si Valencia asin an live in partner kaini sa Edwin Almoite makalihis na magpositibo na nagpapabakal nin pigpapangalad na bulong sa pigkondusir na buy-bust operation kan mga kapulisan.
