NAGA CITY- Nagkonsulta na suboot sa mga abogado an pamilya kan 44 miyembro kan PNP Special Action Force (SAF) na binawian nin buhay sa nangyaring engkwentro sa Mamasapano, Maguindanao kan taong 2015 para sa planong pagsusunad nin reklamo laban ki Ombudsman Conchita Carpio-Morales.
Ini an sinaysay ni Volunteers Against Crime and Corruption (VACC) Founding Chairman Dante Jimenez sa entrevista kan Bombo Radyo Naga.
Sigon ki Jimenez, igwa siyang naresibeng impormasyon na nagkonsulta na sa saindang mga abogado an pamilya kan nagadan na SAF 44 sa nasambitang operasyon.
Katakod kaini, nakaandam na suboot an mga abogado kan VACC na magtabang sa pamilya sa legal na pangangaipuhan kan mga ini.
Enot kaini, sinaysay ni Jimenez na plano kan pamilya kan SAF 44 na sunadan nin impeachment complaint si Ombudsman Morales makalihis na haleon suboot sa Mamasapano Massacre si dating Presidente Noynoy Aquino.
